شعب بلا كتالوج..طال عمرك

د.أحمد محمد علي

شعب مالوش كتالوج.. ما تعرفش هو خانع ولا مقاوم بطريقة مختلفة.. مهزوم ولا منتصر.. مكسور ولا مجبور.

لو عاوز تفهمنا.. يبقى لازم تأكل من اكلنا وتشرب من شربنا وتلبس هدمتنا.. روحك تروح لطبق فول بالزيت الحار على عربية في حارة.. شوب عصير قصب ساعة عصاري.. شاي ميزة بحليب .. ريحة معسل سلوم مخلوط بنشارة قهوة بلدي بكراسي قش… نتغدى لحمة راس وشوربة كوارع مع شوية ممبار وشوية سلطة نار في كيس.

لو عاوز تفهمنا.. يبقى لازم تفهم لغتنا .. احنا بنغيرها كل ساعة ..بنجددها..بنطورها.. بنخليها بتاعتنا.. بنخلي الديناصور يسكور عالناصية.. احنا بنفشخ المنطق .. ونفيش الهوامش.. وما حدش يفهمنا غير اللي منا.

لو عاوز تفهمنا.. هنلاعبك صلح.. ومش هتعرف مبن هيديك بالقفا وامتى.. ولما تفتكر انك ركبت ودلدلت رجليك هتكتشف إن عيالنا ولاد الحارة قعدوك على خازوق… وكتبوا على ظهرك العبيط أهو.

لو عاوز تفهمنا.. اوعاك تهينا.. راح نهنيك بنكتة تصبح اسطورة..وكل ما الناس تشوفك يفتكروا النكتة وتبان ادامهم اصغر من حجمك الحقيقي.. واسال اللي معاه سلاح وبقى اسمه ولقبه العرص.. وبلحة.

لو عاوز تفهمنا.. جرب تدخل الأستاد.. تتنطط مع شباب التالتة شمال.. ويكسروا مناخير أجدع غراب معشش في حياتهم… ويغيبوا تفتكرهم انتهوا.. وانك ركبت ودلدلت.. ويحطوك تاني على الخازوق ويغنولك.
طال عمرك .. طال عمرك

من صفحته على الفيس